Прыемна было бачыць, як багата завітала на яе сем’яў з дзецьмі, школьнікаў і проста неабыякавых да братоў нашых меншых жыхароў горада.
Кожны наведвальнік мог аддаць свой голас за ўпадабаную жывёлу ў выглядзе налепкі. Паводле вынікаў такога галасавання пухнаты з самай вялікай колькасцю галасоў-налепак узнагароджваецца кормам і атрымлівае ганаровае званне, для кагосьці нават не першае, як для гадаванцаў адной са шматлікіх удзельніц выстаўкі – Людмілы Сяргееўны, якая з прыемнасцю пагадзілася адказаць на нашыя пытанні.
– Пані Людміла, раскажыце нам, калі ласка, пра вашых цудоўных катоў.
– У нашай сям’і ажно шэсць катоў, мы ўсіх іх вельмі любім! Адна з іх – па мянушцы Саванна, належыць да надзвычай рэдкай пароды Ф4. Паходзіць яна ад гепардаў, што моцна адбіваецца на яе паводзінах: Саванна дае сябе лашчыць толькі тады, калі сама захоча. Яшчэ яна любіць знаходзіцца па-над усімі астатнімі катамі ў доме, можа нават біць іх, сцвярджае гэтак сваё «панаванне», хаця і неласкавай яе назваць таксама нельга. Самае галоўнае – не браць на рукі. Для Саванны гэта ўжо чацвёртая выстаўка, на якіх яна заўсёды перамагае. На папярэдняй, у Слуцку, яна нават атрымала званне «чароўнай пані»! А вось яшчэ адзін, Грэй, хатні кот, пароды ў яго няма, але вельмі прыгожы, добры. Ён упершыню ўдзельнічае ў выстаўцы, таму трошкі хвалюецца, сёння ж столькі наведвальнікаў, асабліва дзяцей, і багата хто праяўляе цікавасць менавіта да яго.
– Калі раптам нашыя чытачы зацікавяцца, то якія галоўныя патрабаванні да ўдзельнікаў выстаўкі?
– Галоўнае – жаданне. Бо трэба падрыхтавацца, прыйсці ў выходны дзень. Я ведаю багата людзей у нашым горадзе з прыгожымі катамі, але не кожны гатовы траціць свой час на гэта. А пародзісты ваш кот, ці не – не так важна. Наш Грэй, напрыклад, не мае пароды. І, канешне, ваша жывёла мусіць быць дагледжанай.
– Як вы думаеце, якая галоўная мэта падобных мерапрыемстваў?
– Мне падаецца, што падобныя выстаўкі перш за ўсё спрыяюць выхаванню ў людзях, асабліва ў маладым пакаленні, любові да жывёл. Тут дзеці могуць паглядзець на коцікаў розных парод. І зусім маленькім дзеткам, і школьнікам мы адкрываем клеткі, каб яны маглі іх прылашчыць, пагладзiць. Калі бачыш гэта, то так добра робіцца на душы. Так што, выстаўкі катоў – гэта не толькі пра камерцыю, прынамсі для мяне (усміхаецца).
Выстаўка скончылася дэфіле катоў у адмыслова для гэтага пашытых касцюмах. Для дзяцей арганізатарамі ладзіліся тэматычныя гульні-забаўлянкі.
ДАВЕДКА
Грамадскае аб’яднанне «Клуб аматараў катоў «Бастэт» г. Бабруйска» месціцца па вуліцы Фрыдрыха Энгельса, 75-а, офіс 2. З моманту заснавання ў 2009 годзе налічвае сотні ўдзельнікаў. Старшыня клуба – Вольга Шавель, тэл. +375-44-708-21-90.
