115 работ за 48 год. У Бабруйску адкрываецца юбілейная выстава вядомага мастака Анатоля Концуба

335

11:30 Дзяніс НОСАЎ, фота аўтара

Выстава «Дарога да дому» адкрыецца 18 кастрычніка ў 17.00 у галерэі Бабруйскага мастацкага музэя (вул. М. Горкага, 28).

16.10.2024, галерэя Бабруйскага мастацкага музэя. Анатоль Концуб рыхтуецца да адкрыцця сваёй выставы

Выстава прысвечаная юбілею славутага бабруйскага мастака (нядаўна Анатоль Концуб адзначыў 75-годдзе). З такой нагоды можна будзе пабачыць шмат прац за ўвесь ягоны творчы шлях да сённяшняга дня. Пад выставу адвялі две залы галерэі, бо будзе 30 керамічных прац і ажно 85 жывапісных.

16.10.2024, галерэя Бабруйскага мастацкага музэя. Падрыхтоўка да адкрыцця выставы Анатоля Концуба

Анатоль Концуб нарадзіўся ў 1949 г. на Палессі. З 1971 г. жыве ў Бабруйску, 30 год выкладаў кераміку ў Бабруйскай мастацкай вучэльні. Заслужаны работнік адукацыі. Сябра Саюзу мастакоў. Удзельнік шматлікіх міжнародных выставаў, творы захоўваюцца ў музэях і прыватных калекцыях па ўсяму свету.

Прадстаўленыя работы ахопліваюць усе гады творчай працы Анатоля Концуба як прафэсійнага мастака. Ад самай першай выставачнай работы – керамічнага рэльефу для яго першай выставы (1976 года!) да зусім свежых, 2024 года.

Сярод новых работ будуць новыя не толькі па часе, але і новыя для мастака прынцыпова, якіх ён раней не рабіў – тэматычныя тэтрапціхі, кампазіцыі з чатырох карцін, нечым аб'яднаныя. Ці асноўным колерам, ці забаўным падыходам да быццам відавочнай тэмы. Яны ўжо выстаўляліся на юбілейнай выставе ад Саюза мастакоў у Мінску, і гледачам спадабаліся.

Выстава Концуба ў галерэі на цэнтральнай плошчы Бабруйску будзе доўгай, па плану – да 15 снежня. Звычайны квіток (на Концуба і на ўсю экспазіцыю галерэі) каштуе 4 руб. 20 коп. На адкрыццё юбілейнай выставы, 18 кастрычніка а 17-й – у два разы танней, 2,10 руб.

Як мастак ужо рыхтуецца да адкрыцця экспазыцыі, глядзіце ў невялічкім фотарэпартажы: