![7 мая 2022 года. У Мінску развітваюцца са Станіславам Шушкевічам.](https://media.bobruisk.ru/gRnQAAAAAACtX2FQAsc/photo.webp)
![7 мая 2022 года. У Мінску развітваюцца са Станіславам Шушкевічам.](https://media.bobruisk.ru/gRnQAAAAAACtYqF4BQA/photo.webp)
Развітанне са Станіславам Шушкевічам пачалося а 20-й у пятніцу, 6 мая ў архікатэдральным касцёле Найсвяцейшага Імя Марыі ў Мінску, цягнулася ўсю ноч, раніцай у касцёле не змясціліся ўсе ахвотныя, шмат стаялі на плошчы Свабоды.
А 12 гадзiне развiтацца з Шушкевічам прыйшлi больш за тысячу людзей.
Было шмат дыпламатаў і вянкоў ад Еўрапейскага саюзу, Польшчы, Чэхіі, Германіі, Швецыі, Вялікай Брытаніі і іншых краін. Прыехала першая амбасадарка Польшчы ў Беларусі Эльжбэта Смулкава, не гледзячы на свае 90 год.
Зачыталі ліст ад прэзідэнта Польшчы Анджэя Дуды, дзе ён назваў Шушкевіча «добрым суседам».
Быў вянок і развітальнае слова ад супрацоўнікаў кафэдры ядзернай фізікі БДУ, якую Станіслаў Шушкевіч узначальваў да старшынства ў Вярхоўным Савеце.
Арцыбіскуп Тадэвуш Кандрусевіч у вельмі эмацыйнай прамове сказаў: «Бог паставіў яго ў патрэбны час на патрэбнае месца». І прыгадаў словы Шушкевіча напачатку незалежнай дзяржаўнасці: «Я не хачу каб свет смяяўся з Беларусі. Я хачу каб пра Беларусь казалі толькі добрае».
Першага кіраўніка незалежнай Беларусі праводзілі доўгімі апладысментамі і крыкамі «Дзякуй!»
Апладысменты не сціхалі больш за 5 хвілін.
Станіслаў Шушкевіч – вядомы беларускі вучоны, палітычны і грамадскі дзеяч, адышоў у вечнасць 3 мая з-за ўскладненняў пасля перанесенага каранавіруснага захворвання.
Пахаваны Станіслаў Шушкевіч на Паўночных могілках. Былы кіраўнік краіны ляжць на новым участку ў сярэдзіне цэнтральнай алеі, амаль пад плотам... У адным шэрагу з Раманам Бандарэнкам.