Больш за 2200 чалавек ўжо зарэгістраваліся для ўдзелу ў акцыі «Агульная дыктоўка». За кожнага чалавека, які прыме ў ёй удзел, арганізатар праекта пералічыць 5 рублёў для дапамогі медыкам, якія змагаюцца з COVID-19, а таксама дадатковыя сумы за ўсіх, хто атрымае 9 і 10 балаў, але ж гэта адбудзецца, калі ўсе зарэгістраваныя напішуць дыктоўку.
«Агульная дыктоўка» – праект беларускай піўной кампаніі, накіраваны на падтрымку беларускай мовы. Упершыню «Агульная дыктоўка» прайшла ў 2017 годзе ў Нацыянальнай бібліятэцы. Праект тады падтрымлівалі групы Naviband, SHUMA, акцеры Купалаўскага тэатра, рэжысер Іван Пінігін, пісьменнікі Андрусь Горват і Людміла Рублеўская. У 2019-м, дзякуючы радыетрансляцыі, да праекта змаглі далучыцца з ЗША, Польшчы, Расіі і Украіны, распавялi арганізатары праекта.
«Агульная дыктоўка» пройдзе у суботу, 6 чэрвеня. Прамое ўключэнне будзе арганізавана на YouTube. Спасылку на трансляцыю ўдзельнікі атрымаюць загадзя на электронны адрас, пазначаны пры рэгістрацыі.
Рэгістрацыя адкрыта да 4 чэрвеня ўключна і даступная па спасылцы.
