Святочны канцэрт Пугача ў Бабруйску (фота+відэа)

Выступы Уладзіміра Пугача адбыліся бясплатна. Уладзімір – ганаровы амбасадар ЮНІСЕФ, таму часта дапамагае дзіцячым дамам. Удзень 21 лютага разам з кіраўніком беларускага аб’яднання ў Швейцарыі Александрам Сапегам яны зладзілі дабрачынны выступ для выхаванцаў Каменскага дому-інтэрнату. А ўвечары ў Бабруйску, у тайм-клубе «13:87», выступ прайшоў у межах святочнай вечарыны курсаў «Мова нанова», прысвечанай Міжнароднаму дню роднай мовы.

Уладзімір Пугач праспяваў і даўно любімыя, і песні з новага альбому. У гонар свята – пераважна беларускамоўныя песні ці беларускія варыянты двухмоўных. Перапоўненая зала падпявала і падказвала словы.

Музыка таксама атрымаў падарунак – Алесь Сапега падараваў яму ільняную кашулю-вышыванку, і далей Уладзімір выступаў ужо ў ёй.

А на развітанне Уладзімір Пугач распісаўся на «сцяне аўтографаў» ды паўдзельнічаў у працяглай фотасесіі з удзячнымі слухачамі.