Пачастункі і песні на свята прынеслі і жыхары Глушы, і ўмельцы ды творчыя калектывы з усяго Бабруйскага раёна, а таксама госці з Асіповіцкага, Глускага, Кіраўскага, Клічаўскага, Слаўгарадскага і Хоцімскага раёнаў. Гарбацэвіцкі, Хімоўскі, Бортнікаўскі ды іншыя «падворкі» – нават «ветэранскі» – налівалі, накладвалі, паказвалі працы майстроў ды прапаноўвалі тавары на любы густ: ад яблычных пірагоў ды букетаў з засушаных кветак да драўляных збаноў ды па-мастацку аздобленых мангалаў.
У розных кутках святочнай паляны артысты самадзейных гурткоў і дамоў культуры разыгрывалі сцэнкі народных абрадаў і гулянняў – з гасцямі фэста ці між сабой. І ўвесь дзень бесперапынна працягваўся канцэрт.
Пачынаўся глушанскі фэст у 2010 годзе з дапамогай Еўрапейскага Саюза і Праграмы развіцця ААН «Устойлівае развіццё на мясцовым узроўні» як сельскае свята, хоць на яго адпачатку запрашалі гасцей з усёй краіны. Аднак ужо другі год фэст мае статус раённага, а калі лічыць па гасцях – ужо і міжнароднага, бо сёлета ў ім удзельнічалі і дэлегацыі з Валагодскай і Ніжагародскай абласцей Расіі.
– Вядома ж, цяпер усе атрымліваецца лепш, – кажа старшыня Глушанскага сельсавета Марыя Сушчанка. – Раней самі ўсё рабілі, а цяпер у памочніках цэлая «армія» работнікаў райвыканкама.
– Калі я ўзначаліла сельсавет, я прыкмеціла гэтую паляну і сказала: зробім тут якое-небудзь свята. Цудоўная ж пляцоўка – на ўскрайку вёскі, але аточаная лесам, як хутар. І калі сталі прыдумваць назву свята – так і нарадзіўся «Глушанскі хутарок».
У дзень фестываля ў Глушы адбылася яшчэ адна урачыстасць: адкрылі арт-аб'ект «Прыпынак Адамовіча» – аўтобусны прыпынак, аздоблены ў гонар славутага земляка Алеся Адамовіча. Падрабязней пра гэта ТУТ.
У наступным, 2019 годзе, «Глушанскі хутарок» адзначыць юбілей – фэст адбудзецца ў дзясяты раз.
