Настоятель Бобруйского костела Непорочного Зачатия Пресвятой Девы Марии ксёндз Андрей Ярковец.
Дарагія браты і сёстры ў Хрысце, а таксама ўсе людзі добрай волі, Хрыстус уваскрос – сапраўды ўваскрос!
Гэтым пасхальным воклічам сардэчна вітае ўсіх вас арцыбіскуп Тадэвуш Кандрусевіч і я, далучаючыся да ягоных словаў, віншую з радасным і збаўчым, самым вялікім і найбольш важным хрысціянскім святам Уваскрасення Хрыста! Гэтае свята мы адзначаем з радасцю, бо праўда пра ўваскрашэнне дае надзею і падтрымку ў жыццёвых цяжкасцях. Яна таксама нагадвае нам, што варта жыць, бо перад намі перспектыва шчаслівай вечнасці.
Напэўна, усім нам вядома грэчаская паэма пра легендарную птушку фенікс. Прадбачачы сваю смерць, яна з галінак пахучага дрэва звіла сабе гняздо, у якім згарэла. Аднак з попелу, што застаўся пасля яе, вылецела новая птушка. Адсюль і паходзіць выраз «адрадзіцца, як фенікс з попелу».
Такім чынам, фенікс сімвалізуе несмяротнасць, уваскрасенне і жыццё пасля смерці. Таму ў гэтым вобразе вельмі добра бачна велікоднае пасланне, бо Езус аддаў сваё жыццё за збаўленне свету і на трэці дзень уваскрос. У ім новае жыццё паўстала з попелу смерці.
Бобруйский костел Непорочного Зачатия Пресвятой Девы Марии.
Сёння мы адзначаем перамогу Хрыста над грахом, смерцю і злым духам. Гэтая перамога з’яўляецца дарам вечнага жыцця для веруючых у Езуса. Менавіта таму фенікс – адзін з самых ранніх сімвалаў уваскрослага Хрыста.
Няхай Уваскрослы Езус Хрыстус напоўніць вашыя сэрцы радасцю і супакоем, а таксама дасць і ўмацуе вашае фізічнае і духоўнае здароўе, якое дапаможа вам у сведчанні аб праўдзе Змертвыхпаўстаня ў штодзённым жыцці.
Ксёндз Андрэй ЯРКАВЕЦ, пробашч парафіі Беззаганнага Зачацця Найсвяцейшай Панны Марыі ў г. Бабруйску
Расклад набажэнстваў у бабруйскім касцёле Беззаганнага Зачацця Найсвяцейшай Панны Марыі на святы Пасхальны Трыдуум (вул. Кастрычнiцкая, 121)
4 красавіка, Вялікая Субота: святая Пасхальная вігілія – 21.00.
5 красавіка, Нядзеля Уваскрасення Пана, Вялікдзень – рэзурэкцыйная працэсія і ўрачыстая святая імша – 7.00.
У нядзелю, 12 красавіка – тэатралізаваная містэрыя «Таямніца Эўхарыстыі» у выкананні парафіяльнай моладзі – 20.00.
